Kongar av komfortable og musikalske samantreff

Eit tappert forsøk på å oversetje Kings of Convenience til ein fiffig tittel. I dag var eg og Mari i Grieghallen og såg nettopp dette bandet og eg må seie det slik; eg har framleis gåsehud på heile kroppen og eit smil om munnen. At to gitarar kan vere så kjekt i lag, ikkje minst med to mjuke stemmer som passar så godt saman at eg må flette fingrar med meg sjølv. Folk strauma ned til scenen i frå amfiet og vugga fram og tilbake i rytme med musikken, vi holdt oss på raden vår, men vugga og klappa til den store gullmedalje, lo mykje gjorde vi også, dei tulla sånn på scena. Etter at ein fiolin, ein kontrabass og eit trommesett også vart introdusert vart det meir liv, Erlend hadde også bursdag, då måtte salen synge bursdagssong! No sit eg med ei kald fatøl og kosar meg heime etter å ha tatt ei pils ute med pappa. Han er på besøk! Han laga til og med biffmiddag til oss, nam. Bra dag.

(bra stemningsmusikk)

No er eg ferdig med min andre og siste eksamen for hausten, hurra! Eg har dusja, sminka meg og spelt kjekk radio ei stund no og skal henge med kule folk som eg er glad i og vi skal på eit vis feire meg fordi eg har hatt bursdag. Fatøl er innkjøpt samt at vi har masse sjokolade. Dette blir bra. Kanskje det blir ein liten tur ut om veiret tillet det? I morgon kjem pappa på besøk og gir meg gåve og skal lage biff med fløtesaus. Trur dette kan bli ei kosleg helg. No skal eg setje på litt stemningsmusikk og danse.

Sjå berre

Eg fekk eit måleri av meg sjølv til bursdag, tusen takk Mari. Sjå berre(dette biletet stjal eg frå Stine, ups):

Originalbiletet:

Å ha kreppapir i håret er heller ikkje å forakte. No fargar eg håret, det ser ut til å bli ganske raudt, er litt usikker på kva eg synest om det.

Gebursdag

I dag fyller eg 19 år. Berre eit år til eg kan vere kul og vere med ut på dei kule plassane. Eg vakna til frukost på senga og te-lys takka vere Stine og Elias som er kjekke og ga meg eit gavekort i gave. Eg brukte kortet på ei varm vinterjakke, dessutan har eg også fått ein bunke brukte bøker, vottar og fingervantar, frukostgavekort på godt brød, varme sokkar og eit inneramma bilete av søskenflokken, ein bukett blomar, ei bok som handlar om Hanne frå Frankrike og ikkje minst eit mala portrett av meg. Bra dag!

Mövenpick, hurra!

Eg har kjempegod is med lønnesirup og valnøtter i, ein fin kveldskos til kaffien. Eksamen i dag gjekk fint, eg tykkjer det er verdt å feire. Å skrive ni sider på tre timar har gjort sitt til at hendene mine gjer opprør i form av smerte og krampe. Avslapping i dag og i morgon(bursdag, bursdag!) burde vere nok til at fingrane er klare til ny eksamen på fredag. Urk. Eg må ete meir is.

Faen

!

Eg har blitt lurt. Heile samlinga med Monty Python som eg så flittig har lasta ned hadde russisk voiceover. Typ Tre Nøtter Til Askepott som går lille julaftan berre ikkje koseleg i det heile tatt! Kven i innste skogen legg ut det for nedlasting i utgangspunktet? Det er sikkert min eigen feil at eg ikkje les på filnamna nøye nok, men skuffelsen er stor og eg har no ingen premie til etter eksamen. Som forøvrig er om ca 9 timar. Herregud, eg er så redd for å få jernteppe at det gjer låkt. Ein annan ting eg kan glede meg over er at eg har bursdag på tysdag og eg skal få gåver og klemmar, eg har også baka kake, men den et eg sikkert opp i morgon midt i alle eksamensettervirkningane. Sove no, kom igjen.

Konsentrasjon

Eg er våken, men ikkje oppegåande. Lat oss håpe kaffien set ting i sving. I dag skal eg lese i den kjipe boka og notere viktige ting eg ikkje må gløyme. I morgon er det eksamen, noko eg eigentleg ikkje tenkjer så mykje på anna enn at eg må stå opp uhyre tidleg for å kome meg på ein buss til ein turnhall ein kvan stad. Eg kjem til å vere svett, kvalm, svimmel, låk i hendene mine og generelt kritisk til alt og alle.

Eg klarar ikkje konsentrere meg, eg har no kasta vekk ein time på å lese andre sine bloggar om innhaldsrike liv og ballongar og kjærleik. Eg vil ha sumar, festival, sol, musikk, kjolar, øl, rangling og alt anna som er kjekt. Snart er det vinter og julestress, eg skal ha eksamen og skrive oppgåve og ha breiddetest. Dei få vekene eg har att i hærlige Bergen er fulle av stress og prestasjonsangst. Eg lyt sørge for å ha det kjekt i helgene og ta bilete medan det framleis er dagslys ute. Det er ein ting eg gledar meg til; å renne på kjelke. I termodress. Kakao etterpå. Ah. Eg saknar ting eg ikkje har frå før, mellom anna akrylmaling, lerret, fine penslar, film til kamera, vottar, eksotisk te, ein fin cardigan (som ikkje er ein gammal genser) og mykje anna fint. Eg har bursdag om to dagar, tenk på det! Eg blir heile 19 år, æsj.

Oppdatering av isolasjon #4

I dag er det Laurdag. Etter å ha sove til klokka var nesten halv to så har eg hovudsakleg levd eit innhaldsfattig liv der eg har åte frukostblanding og grandiosa i mellom leseøktene. Ein tur på butikken for å kjøpe øl og banan er det einaste eg har gjort utanom dette. Wow. I natt hadde eg ein ganske artig draum, eg var i England og gjekk siste året på bachelor i lydproduksjon. Eg var av ein eller anna grunn over snittet kul, overalt kvar eg gjekk fekk eg kommentarar på kor kule klede og kor generelt kul eg var, kva er det undermedvita mi no vil fortelje? Uansett så delte alle elevar ei lita leiligheit med ein medelev, min medelev var ein rocka transvestitt som etterkvart vart min beste ven. Vi sminka kvarandre og spelte inn songar saman, det heile var veldig idyllisk. Alle dei andre på skulen var sjalu på oss fordi vi var slik ein kul duo. Heile draumen var litt som ein dårleg disneyfilm om ungdommar når eg tenkjer meg om. Eg trur eg konkluderar med at det er eit teikn på at eg skal følgje livsløpsdraumen min til hausten. Evt. få ein jobb i butikk..

Oppdatering av isolasjon #3

Eg har kome attende etter min andre tur ut i frisk luft i dag, ein liten tur på butikken for å kjøpe grandiosa, juice og påsmurt lefse. Eg har lese mykje i dag, no gjenstår berre kompendiumet og skumming gjennom Berger & Luckmann. I morgon skal eg halde fram med nettopp dette og lage eit gigantisk tankekart som oppsummerar det heile. Eg har også høyrt på radio i heile dag og fekk til og med sjefslista mi spelt på P3, då vart eg glad. Endeleg fekk eg vidareformidla genistreken The Dead Weather. Hah. Grandiosaen står i ovnen og kosar seg, marsvina sprett rundt på golvet, og når eg er ferdig for dagen skal eg konsumere siste slump av Jack fordi eg kan. Eg trivst i mitt eige selskap, dessutan er det kjekt å spionere på naboane.

Oppdatering på isolasjon #2

I dag tidleg vakna eg opp til tre gongar av at eg trudde eg hadde forsove meg, men i realiteten hadde eg kjempegod tid. Det enda sjølvsagt med at eg faktisk forsov meg, men eg rakk seminarmøtet. Eg innser no kvifor Nygårdshøyden er ettertrakta bopel for så mange studentar, det tok meg to minutt å gå til skule i kontrast til dei ti minutta eg elles brukar. No har eg sluppe marsvina ut av buret og mata dei, voldsomt til tusling rundt på golvet. Nu: bøker, kaffi, chocopops.